الحمد لله

الحمد لله انى انسان مش حيوان مليش عقل او جماد مليش قلب ..... الحمد لله انى عندى اب و ام اينعم رخمين عليا شوية بس احن من الكل عليا و بيحبونى لدرجة كبيرة اوى مع انى مش بعمل فى المقابل !!!!!

الحمد لله انى بشوف عشان اشوف البدر فى كماله..... اشوف عينين الانسان اللى بحبه....اشوف عروستى جمبى منورانى يوم جوازنا ...... اشوف ابنى اول ما يتولد ..... اشوفه و هو اول مرة يجيلى يقولى بابا و اخده فى حضنى واسمعها منه ....... اشوفه مع اول خطو يخطيها و اسنده لما يقع و اقوله "جرب تانى"...... اشوفه فى اول يوم و هو رايح المدرسه....... اشوفه و هو جايبلى كشكوله و يقولى "بص يا بابا الميس اديتلى نجمه و الفصل سقفلى "اشوفه و هو رايح الجامعه ....... و شويه و هو متجوز و شايل ابنه بعدى.

الحمد لله انى لاقى هدمة البسها و لقمة اكلها حتى لو كانت حاف  وبق ميه اشربه و بيت يضلنى و يسترنى حتى لو كانت عشه فوق سطح .

الحمد لله انى مصرى ..... اينعم هى متعبه شوية ..... و مدوخانا شويتين ..... و مطلعا عينا من الاخر بس برده مفيش احن منها عليا ...... ملهاش ذنب ان دم ولادها بقى رخيص عند بعضهم ولا حتى انها بعد ما جمعتهم " مسلم و مسيحى و حتى يهودى " انهم فرقوا نفسهم مليون حزب و مليون اتجاه و كله عاوز ياخد الى يقدر عليه و يجرى .

الحمد لله انى مسلم موحد ..... " ودى لو شكرنا من هنا ل 100 سنه جايه ولا هيكفيها ".

الحمد لله ان عندى قلب طايش و روح مجنونة اقدر بيه كل الناس و ابتسم و ارضى واخاف و اندهش و احلم و احس بالامان و اغضب و اهدى تانى و احزن و ابكى .

الحمد لله مش مجرد كلمة ..... الحمد لله حياه كاملة و احساس بالرضا

بلاد الفول و الطعميه

من خلال نظرتى الملوخية المهلبية المستبعديه ..... احب اقولكوا رأى كخبير استراتيجى امبراتيجى انجراتيجى " يعنى ايه استراتيجى صح ؟؟" و المهم الظروف الحاليه لبلاد الفول و الطعمية و الملوخية ام شهقة فى التقليه بقت عبارة عن مظاهرات عنفوانية نتيجة كبت حاجات اساسية لشعوب غير مرضية مبلية بدستور زى الطرطور لا منه منظر و لا منه حياه لشعوب دمها رخيص على ارضهاو ارخص بره ارضها.

 و من الجانب التانى شباب  حلوان "اخــــــــــــــوان" نازل الميدان مؤيد لاى هرى و بتنجان طالما الكرسى فى الامان و اى حاجة يقولها الحاكم الهومان " مرسى مان " بطل الابطال و حامى الحما يبقى سمع و طاعة و على عيونا ستارة جبارة .

احلى حاجة بقا اننا " الشعب الجميل الصبور المهاود" المراود الى من الللا بيحصل تايه ولا عيل تاه من امه فى سوق الجمعه ..... ده بيقول كلام و ده بيقول كلام ...... ارحموا دماغ ابونا و اللى خلفونا انتوا اشتريتونا ولا استعبدونا ..... طلعتوا "م...... ابونا واللى جابونا"

امتى !!!!

امتى بابا يفهم ان زعيقك ليا مش بيخلينى اذاكر و بيخلينى اعند حتى لو عاوز اذاكر !
امتى "اخوانا " يفهموا ان الدين مش مجرد دقن طويلة و انه معاملة و خلق فى الاساس و احترام للأديان!
امتى تنتهى ظاهرة الحب و الارتباط "التيك اواى " الى تقريبا وصل لسرعة الصوت !
امتى يفهم سواقين التاكسى انهم شغالين بفلوسنا مش يتنكوا و يتأمروا علينا و يمصموا دمنا !
امتى اقول انى مصرى فى اى بلد برا و انا عارف ان حقى هيجيلى لو فى اخر بلاد العالمين!
امتى نحترم ولادنا  ونفهم رغباتهم و مش نكبتها و نعرف انهم هما ضهرنا بعد فترة !
امتى نقدر نشوف باسم يوسف من غير ما يتوقف عشان جرئ شوية!
امتى اعلامنا يبقى " اعلامنا" مش " اعلام الحكومة" سواء "حزب وطنى فلول" او "حزب وطنى اخوانى " !
امتى بجد اشوف الريس بتاعنا فى الشارع ماشى ببساطة  مش يكون فالح الا انه "يقلع الجاكت و يلبس الجاكت" !
امتى نهتم بالجيل الى طالع و نعلمه بجد و نزرع علم فى دماغه مش " سمك لبن تمر هندى " !
امتى نتغير بجد من جوانا و ناخد القرار ده و نكون " خير امه اخرجت للناس " !
امتى هندسة تبقى هندسة و طب تبقى طب مش هندسة تكون بطيخ و طب ملوخية !
امتى نبقى الحزب المصرى الواحد مش مليون حزب !
امتى نسمع و نتعلم مش نرغى و نفتى !
استنونا فى يوميات "امتى" لاننا للاسف مش هنبطل امتى لمده 30 سنه جايه

منين !!!!!

منين احنا بنحب البلد ...... و مش بنساعدها بجد مش مجرد شويه شعارات!!
منين عاوزينا نفهم و نتعلم ...... و المدرسين بيطبخولنا كوسه كل حصه !!
منين الطفل يحب الجامع.... وهو كل ما يدخل يتزعق فيه و يتقاله اخرج برا بلاش دوشه !!
منين احنا شعب واحد .... واحنا اتقسمنا اخوانو سلفيين و مسيحيين و دستور و كنبة و شجرة و ليبرالى !!
منين ادخلوها امنين..... و احنا على بعض مش خايفين و ولادنا فى اتوبيساتهم مش امنين !!
منين احنا غاليين ..... و ديه ابنى الميت ارخص من موبايل او فرده جذمة !!
منين عاوزنى ابتسم ..... و انا مش لاقى لقمة اكلها او غطا فى الشتا !!
منين ابنى عنده شخصية و راجل ..... و انا مش محترم رغباته او رأيه من الاساس!!
منين نتقدم خطوة ...... واحنا مش بنحترم وقتنا ولا مجهودنا ولا حتى رأى غيرنا!!
منين نسمع ..... واحنا مش بنبطل كلام كأن عندنا خمسين فم!!
منين حلم بجيل جديد قوى ...... و اطفالنا فى الشوارع حافيين !!
منين نقوم ببكرة .... واحنا مش قادرين نصحى من امبارح ايام ما كنا فراعنة!!
منين نزرع مبادئ وخلاق و فكر ..... فى ارض مفيهاش مكان من الكوسة و القرع اللى مزروعين فيها !!
منين نجيب عالم .... واحنا بيعلمنا سباكين اخر همهم "فلوس الحصه فين" !!
منين دمنا غالى.... والاسفلت بيشرب منه كل يوم !!

منين يودى على فين ..... و حسبى الله و نعم الوكيل !!!!!!!!!!!!!!!

خطوات

احلم , و متخليش لحلمك حدود , و مهما كان حلمك غير منطقى او حتى بسيط .... حلمك ده ممكن يقوم شعب نايم .... يدب فيه الروح و يحسسه انه لسه عايش ... لسه بيتنفس و لسه بيحس .... ولسه عنده القدرة انه يقرر مصيره بنفسه 

أمن , أمن بحلمك... أمن بعقلك .... أمن بروحك .... أمن بنفسك ..... تقدر تعدى المستحيل اللى احنا خلقناه فى عقولنا و ممكن بيه ندمر احلامنا ...... المستحيل كلمة و تحدى ..... بالبسمة هينهار فى ثوانى ..... و ساعتها هتعرف انك انت المستحيل للمستحيل :) .

فكر , ازاى تقدر تحقق حلمك ده ..... ازاى تقدر تخليه من مجرد صورة اترسمت فى خيالك متعرفش اولها , لواقع تعيش فيه و تحققه و تثبت للعالم كله انه كان غلطان لما قالك " متقدرش " ... 

قرر , و خد القرار انك فعلا خلاص هتسيب قفص الروتين و المنطق , هتقوم و تقوم شعب معاك نايم محتاج للى يقومه بجد مش محتاج للى يقسم فيه ليبرالى و اخوانى و شيوعى و مسلم و مسيحى و سلفى و اقباط مهجر و غيرهم .... قرر انك تقوم" شعب مصرى" عمره مفرق معاه دينك و لا انتمائك و هيقف جمبك كتفه فى كتفك مهما حصل

خطط , ارسم خريطة لحلمك و لون بيها طموحك .... نظم وقتك و جهدك ووزعهم صح .... حط كل امكانياتك فى جدول المقدرة و ابدأ وظفهم كل واحد فى مكانه الصح اللى بيه يقدر يكون رقم واحد فيه .

نفذ , وساعتها هيكون التنفيذ سهل لانك خطط لكل حاجة, حاول مرة و اتنين ومية و الف و متيأس.... ممكن تكون محاولة اليأس هى محاولة النجاح .و صدقنى فى كل مرة تحاول فيها بتتعلم ودى اهم سلاح تدخل بيه المغامرة دى 

.

اللعبة

الحياه بسيطة و مفيش تحدى بيكون صعب الا لو احنا خليناه صعب , خلى حياتك عبارة عن موسيقى جميلة انت اللى تتحكم امتى تكون هادية و امتى تكون حماسية والاهم " امتى تكون مجنونة ".
اللى يقرب منك اوعى تبعد عنه واللى محتاجك فى يوم اوعى تخذله لان هيجى اليوم و تكون محتاج انسان جمبك تحكيله اللك و تتكلم معاه و يقرب منك و ساعتها صدقنى مش هتعيش لوحدك حاكم على نفسك بالعزلة و الوحده لمجرد انك بتدور على الانسان الكامل الى فى خيالك بس اسمحلى اقولك رسالة بسيطة " احنا بشر على الارض مش ملايكة فى الجنة ", هنغلط للصبح بس احلى ما فيها اننا برده بأيدينا اننا نصلح الغلط و نمحيه و نسيب مكانه نقطة بيضاء تنور معاملتك
وخليك دايما فاكر ان الحياه من غير تحدى ماسمهاش حياه .... الحياه مغامرة لذيذة و ساعات بتكون مره بس اهم ما فيها هتلعب اللعبة دى ولا هتكون مجرد مشاهد و تخاف تلعبها لمجرد انك عندك اقوى سلاح "الايمان".
هتلاقى ناس دايما عاوزينك تعمل دا و ناس تانيه عاوزينك تعمل ده تانى خالص بس اهم حاجة قبل ما تشوف دول عاوزين ايه و دول عاوزين ايه اسأل نفسك " انا عاوز ايه ؟".

مش هتعرف ترضى الكل بس ساعتها هتعرف ترضى اهم انسان فى حياتك "انـــــت " .

" ماما حلوة "

ناس فى التحرير ...... و ناس فى محمد محمود...... و ناس فى دار القضاء ....... و ناس فى القصر العينى........  و ناس فى الحمام ...... و ناس البلالا.

نفسى افهم فى ايه ...... دول بيقولوا بيحبوا البلد , و دول بيقولوا بيحبوا البلد ......... و انا و انتا .
عاوزين رئيس حلو ازاى و انتوا من جواكوا وحشين و كلوا بيقول يالا نفسى كدا, والله انتوا لو جالكوا مليون عمر ابن الخطاب و لا هيعمل معاكوا حاجة ولا نسيتوا " ان الله لا يغير ما بقوم حتى يغيروا ما بأنفسهم "

و ياعينى على اعلامنا بقى ..... والله اساتذه ازاى يخوفوا الناس البسيطة او يطمنوهم وقت ما يحبوا ..... انا كشاب مصرى اديهم (10/10) و اقولهم " ماما حلوة ".

هنفضل نايمين لامتى ..... سايبين ناس بتتحكم فينا و فى اصواتنا و فى حياتنا........ كل اللى نفسه يعمل حاجة بيقولك الشعب يريد لدرجة انه لو داخل الحمام و لقى حد جوا هيقولك الشعب يريد.

احنا مين فى وسط اللعبة القذرة دى ..... محدش عارف فين الصح و الاهم " مين الصح ".

All you've to do is just closing your eye, listen to the music you love & dream with your tomorrow :) ♥ , your life , your future family N imagine your self holding your daughter with your hand in green garden under blue sky ,in this moment believe me you gonna forget all making you not have the most "beautiful gift in your life........... "THE SMILE

Try to enjoy you life the most you can , don't let any one make you sad or uncomfortable or Not believing in your ability or your self .

Always remember that you are UNIQUE and no one is the same as you or has what you have.

SO,................. always "SMILE" , cuz only the smile can take you from the darkest hole to the most shiny shore , and gonna clear your mind sky and make your day :) 

" جتها نيلة اللى عاوزة خلف "

احب اقول لكل واحد فاكر نفسه خلاص بقا راجل عشان بقى طويل شوية و لا عشان صوته طلع او حتى عشان بقى عنده شعر فى بعض الاماكن ..... " جتها نيلة اللى عاوزة خلف ".

يابنى الرجولة عمرها ما كانت كدا ...... والا كان الحمار ارجل منك او حتى القرد ولا ايه ؟ ...... الرجولة معاملة و اسلوب تحمل مسؤليه نفسك الاول و انك تعرف تتصرف من نفسك مش تطلع الموبايل و تجرى تقول " ماما ... تعالى خدينى يا ماما " .

الرجولة هى اعتماد اللى قصادك و هو عارف انك هتحاول لاخر نفس و ايمانه بيك انك حتى لو مقدرتش انك على الاقل حاولت بكل اللى عندك عشان متخذلوش.

الرجولة احترام موقف و احترام سلوك و احترام مبدأ مهما كنت معارض ليه بس احترامك لمبدأ غيرك يعنى احترام غيرك لمبدأك و مش شرط انك تقتنع بيه

انا لو اتكلمت للصبح هطلعلك مليون معنى للرجولة ..... وعل رأى محمد سعد " الرجولة ادب مش هز كتاف "
                                                                                         
                                                                                                       اسعد الله مسائكم :D

حلم بسيط

عندما بدأت هذا الامر كنت أأخده بروح المرح والابتسامه ولكن عندما شرعنا فيه وتعقمنا فيه اكثر واكثر كنا نشعر بقسوته و ظلمه
وقد أذال بيديه الباردتين غشاوه النسيان
نظرنا وجدنا الحقيقه التي كانت مختبئه وراء هذا الحاجز

وجدنا الالم و شعرنا بالحزن وذقنا طعم النسيان المغروس في هذه القلوب ونظرنا الي اعينهم وجدنا بها ضوء باهت من الامل برؤيتنا كان ممزوجا بخوف مما هو قادم غدا
كانت علي شفاههم بسمه رضا وفي اعينهم نظره حسره علي كل ما مر من العمر وضاع فجأه و ذهب هباء ومر أمامهم بدون اي احساس بالطمأنينه

اعتقد إنني لن استطيع ان امحي هذه النظرات من ذاكرتي علي مر الزمن
نظره الطفل الذي كان كل حلمه ان يعيش
الأب الذي كل أمله ان يعيش مستورا هو واسرته
الام التي كل امنياتها ان تري زفاف اولادها و ان تحمل بيدها التعبه احفادها
الفتاه التي كل ماتستطيع ان تحلم به هو ان تجد الحب وتتزوج وتنسي هذا الماضي الذي عاشته ف هذا البيت الضحل

هذه ليست حكايه او قصه ما قبل النوم
هذا واقع اسره من اصل مليون اسره تحلم فقط بأن تجد قوت يومها و هي علي أعلي إستعداد بأن تدفع الكثير من الجهد والعرق مقابله
لذلك قد قررت إنني سوف اساعد كل من يحتاج الي بكل ما أتيت من قوه وعزم ولن اتردد يوما عن حلمي في كوني فرد ضمن مجتمع افضل جديد يحلم بالمستقبل لا مجتمع يحلم فقط بأيجاد لقمه العيش

البسمة مش رسمة على الوش

البسمة مش رسمة على الوش ...... البسمة حالة بالرضا.
رضاك عن نفسك هيولد رضا اللى حواليك ليك ..... قرب من نفسك و ابدأ تسمعلها و اعرف هى محتاجة ايه و ابدأالعب عليه و ساعتها هتكتشف نفسك و هتعرف بجد "انت مين".
اوعى تكبت احساس جواك ..... سيبه يطلع و يخرج و يقول الى جواك الى انت خايف منه و خايف غيرك يشوفك بيه..... ساعتها بجد هتعرف حاجات كتير عن نفسك انت مكنتش تعرفها او حتى مكنتش بتفكر فيها .

 البسمة مش رسمه على الوش..... البسمة فكرة .
فكرتك انك مش هتخلى حاجة تفق قصادك و انك تهزم المستحيل لانه مجرد كلمة من اختراعنا....... و كل ما بدأت الفكرة تسيطر عليك هتبدأ تواجه كل حاجة كنت بتسيبها او بتبعد عنها لمجرد انك فى خيالك خليتها عدو صعب الفوز عليه ..... بس كل ما زاد التحدى , زاد لذه الفوز.

البسمة مش رسمة على الوش.... البسمة إيمان.
ايمان بنفسك و بالى حواليك ..... ايمان بربك و بقلبك .....ايمان بروحك الى انت كنت شايفها ضعيفة فى يوم و كنت خايف تعرفها عشان متتعبش منها.
ايمان بحياه مقربتش منها جواك و مش معتقد بوجودها ..... حياه بتعيش فيها البسمة الدور الاول و الاخير رمز البطل الى يقدر يهزم اى تحدى لمجرد ان انسان واحد مأمن بيه " اللى هو انت ".

البسمة مش رسمه على الوش..... البسمة باب.
لما تلاقى كل الابواب مقفولة اول ما تقع ..... وان اللى المفروض يكون جمبك هو اللى بينزلك تحت ..... و مش لاقى اللى تحكى معاه.
ساعتها بتتحول لمفتاح اعظم باب ممكن تتخيله" باب الرحمن" الى موجود معاك دايما و سامع همك و نفسه انك تقرب منه و تقوله اللى جواك و تناجيه بحالك .

البسمة مش رسمه على الوش..... البسمة حياه كاملة

الدم مجرد لون

الدم مجرد لون
لشعب خسيس ملعون 
اخر همه الدورى 
و الاهلى يدخل جون
خلاص بقيت مجنون 
مجنون عشان بتكلم
ازاى انا حزين 
و منين اكون متألم
دا الاهلى جاب الكاس
و فرح الملايين

عبيط انت ولا اهبل
عشان تكون حزين
يا اخوانا دا فى شهداء
لسه ميتين
اطفال مالهمش ذنب
و عددهم بقى خمسين
حرام ماتحسوا بينا
ولا خلاص نسينا
ان الحياه دايرة
والدور جاى علينا
معلش انا الغلطان
نسيت اننا خلاص
بقى حقيقة عندنا
ان الدم محرد لون
لشعب خسيس ملعون
اخر همه الدورى
والاهلى يدخل جون
و ياعينى على الاعلام
والله دا زى الفل
عشرة على عشرة
لاحس دماغ الكل
اطفالنا ميتين
وهما شغالين
فاطمة و كريم
و شارع عماد الدين
هو انا بيتهيألى
ولا احنا بقينا مجانين
متعلبوش فى دماغى
دا برجين اللى فاضلين
هوا انا العاقل وانتوا والمجانين
ولا انا المجنون وانتوا العاقلين
هههههه خلاص مبقتش تفرق
خلاص بقينا عارفين
ان الدم مجرد لون
لشعب خسيس ملعون
اخر همه الدورى